कात्तिक २०,कञ्चन ।
एजेन्सी – भारतले आइसिसी टि२० विश्वकप २०२१ मा स्कटल्यान्डलाई ८ विकेटले हराउँदै सेमिफाइनल सम्भावना कायमै राखेको छ । सुपर १२ को समूह २ मा रहेको भारतले स्कटल्यान्डमाथि सानदार जितको साथ नेटरनरेटमा सुधार गर्दै सम्भावना आशा बढाएको छ ।
जितका लागि ८६ रनको सामान्य विजयी लक्ष्य पछ्याएको भारतले ६.३ ओभरमा २ विकेट गुमाउँदै पूरा गर्यो । भारतका ओपनर लोकेश राहुलले १९ बलमा ६ चौका र ३ छक्का सहित ५० रनमा आउट भए । राहुलले १८ बलमै अर्धशतक पूरा गरेका थिए ।
रोहित शर्मा १६ बलमा ५ चौका र १ छक्का सहित ३० रनमा एलबीडब्लू आउट भए । ओपनर रोहित र रोहलले पहिलो विकेटका लागि ५ ओभरमा ७० रनको विष्फोटक ब्याटिङका साथ उत्कृष्ट सुरुवात दिलाएका थिए । भारतले पहिलो पावर प्ले अर्थात ६ ओभरमा २ विकेट गुमाउँदै ८२ रन बनाएको थियो । पावर प्लेमा भारतले बनाएको सर्वाधिक रन हो । सूर्यकुमार यादव ६ र विराट कोहली २ रनमा अविजित रहे ।
त्यसअघि दुबई इन्टरनेशल क्रिकेट स्टेडियममा टस हारेर ब्याटिङ थालेको स्कटल्यान्ड १७.४ ओभरमा ८५ रनमा अल आउट भएको थियो । स्कटल्यान्डका ओपनर जर्ज मुन्शेले १९ बलमा ४ चौका र १ छक्का सहित सर्वाधिक २४ रन बनाए । कलुम म्याकलड १६ र माइकल लिस्क २१ रनमा आउट भए ।
तीव्र गतिका बलर जस्प्रित बुमराहले तेस्रो ओभरको तेस्रो बलमा ओपनर तथा कप्तान काइल कोट्जरलाई १ रनमा बोल्ड आउट गरे । छैटौं ओभरको दोस्रो बलमा तीव्र गतिका बलर मोहम्मद शामीले मुन्शेलाई हार्दिक पान्ड्याबाट क्याच गराएपछि स्कटल्यान्डले रन जोड्न संघर्ष गरेको थियो । त्यसपछि स्पिनर रविन्द्र जडेजाले स्कटल्यान्डको ब्याटिङक्रम धरासय बनाएका थिए ।
रिची बेरिंगटनलाई जडेजाले शून्यमा बोल्ड आउट गरे । सातौं ओभरको अन्तिम बलमा म्याथ्यु क्रसलाई एलबीडब्लू आउट गरेपछि स्कटल्यान्ड समस्यामा परेको थियो । जडेजालेनै आक्रामक ब्याटिङ गरेका माइकल लिस्कलाई २१ रनमा एलबीडब्लू आउट भएपछि मध्यम योगफलको सम्भावना पनि टाढिएको थियो । लिस्कले १२ बलमा २ चौका र १ छक्का प्रहार गरे । मार्क वाटले १३ बलमा २ चौका सहित १४ रन बनाए ।
भारतका स्पिनर रविन्द्र जडेजाले ४ ओभरमा १५ रन खर्चेर ३ विकेट लिए । तीव्र गतिका बलर मोहम्मद शामीले ३ ओभरमा १ मेडन सहित १५ रन खर्चेर ३ विकेट लिए । जस्प्रित बुमराहले ३.४ ओभरमा १ मेडन सहित १० रन खर्चेर २ विकेट लिए । रविचन्द्रन आश्विनको नाममा १ विकेट रह्यो ।
यो जितसँगै भारत तेस्रो स्थानमा उक्लिएको छ । भारतको ४ खेलमा २ मा जित र २ मा हार सहित ४ अंकका साथ तेस्रो स्थानमा छ । भारतले अन्तिम खेलमा नामिबियालाई सोमबार विशाल अन्तरले हराउनु पर्छ । तर अन्तिम खेलमा आइतबार न्युजिल्यान्ड अफगानिस्तानसँग पराजित भएको खण्डमा मात्र भारत सेमिफाइनलमा पुग्न सक्छ ।
न्युजिल्यान्ड विजयी भएमा भारत बाहिरिनेछ । न्युजिल्यान्ड अन्तिम खेलमा विजयी हुँदा ८ अंक हुने छ । भारतले अन्तिम खेलमा जित निकालेको खण्डमा ६ अंक मात्र हुनेछ । जसको कारण न्युजिल्यान्ड पराजित भएमा मात्र भारत नेटरनरेटको आधारमा सेमिफाइनलमा पुग्न सक्छ । तर नेटरनरेटमा निर्भर रहनेछ । भारतको नेटरनरेट प्लस १.६१९ र न्युजिल्यान्डको प्लस १.२७७ छ । अफगानिस्तानको नेटरनरेट प्लस १. ४८१ छ ।
अंक तालिका
सुपर १२ को समूह १ मा इंग्ल्यान्ड ४ खेलमा ४ मानै जितका साथ ८ अंक जोड्दै शीर्षस्थानमा छ । इंग्ल्यान्ड सेमिफाइनलमा पुगि सकेको छ । अष्ट्रेलिया ४ खेलमा ३ मा जित र १ मा हार सहित ६ अंकका साथ तेस्रो स्थानमा छ । अष्ट्रेलियाको नेटरनरेट प्लस १.०३१ छ । दक्षिण अफ्रिकाको ४ खेलमा ३ मा जित र १ मा हार सहित समान ६ अंक भएपनि रनरेटका कारण तेस्रो स्थानमा छ । दक्षिण अफ्रिकाको नेटरनरेट प्लस ०.७४२ छ । श्रीलंका ५ खेलमा २ मा जित र ३ मा हार सहित चौथो स्थानमा रहेर बाहिरिएको छ । वेस्टइन्डिज ४ खेलमा १ मा जित र ३ मा हार सहित पाँचौ स्थानमा रहेर बाहिरिएको छ। बंगलादेश ५ खेलमा ५ मानै हारका साथ बाहिरि सकेको छ ।
सुपर १२ को समूह २ मा पाकिस्तान ४ खेलमा ४ मानै जितका साथ शीर्ष स्थानमा छ । पाकिस्तान सेमिफाइनलमा पुगि सकेको छ । न्युजिल्यान्ड ४ खेलमा ३ मा जित र १ मा हार सहित आधारमा दोस्रो स्थानमा छ । भारत ४ खेलमा २ मा जित र २ मा हारका साथ तेस्रो स्थानमा उक्लिएको छ । अफगानिस्तान ४ खेलमा २ मा जित र २ मा हार सहित चौथो स्थानमा छ । नामिबिया ४ खेलमा १ मा जित र ३ मा हार सहित पाँचौं स्थानमा छ । स्कटल्यान्ड सुरुवाती ४ खेलमानै पराजित भएको छ ।
-1730900112.jpg)
