असोज १२,कञ्चन ।
एजेन्सी – स्पिन अलराउन्डर सुनिल नारायणको अलराउन्ड प्रदर्शनमा इन्डियन प्रिमियर लिग (आइपिएल) को ४१ औं खेलमा कोलकाता नाइट राइडर्सले दिल्ली क्यापिटल्सलाई ३ विकेटले पराजित गरेको छ । यो जितसँगै कोलकाता शीर्ष चारमा रहेर प्लेअफ खेल्ने सम्भावना बलियो बनेको छ ।
जितको लागि १ सय २८ रनको विजयी लक्ष्य पछ्याएको कोलकाताले १८.२ ओभरमा ७ विकेट गुमाउँदै पूरा गर्यो । कोलकाता जितमा तल्लोक्रमका सुनिल नारायण १० बलमा १ चौका र २ छक्का सहित २१ रन जोड्दै आउट भए । मध्यक्रमका ब्याटर नितिश राणा २७ बलमा २ चौका र २ छक्का सहित ३६ रनमा अविजित रहे । ओपनर सुभमन गिल ३३ बलमा १ चौका र २ छक्का सहित ३० रनमा आउट भए ।
कोलकातालाई ओपनर गिल र वेंकटेश ऐरले पहिलो विकेटका लागि ४.३ ओभरमा २८ रनको साझेदारी गर्दै सुरुवात दिएका थिए । ललित यादवले ऐरलाई १४ रनमा बोल्ड गर्दै पहिलो सफलता दिलाएका थिए । छैटौं ओभरको पाँचौं बलमा आवेश खानले राहुल त्रिपाठीलाई ९ रनमा स्टिभ स्मिथबाट क्याच गराए । कागिसो रबाडा ११ औं ओभरको अन्तिम बलमा गिल श्रेयस ऐरबाट क्याच आउट हुन पुगे ।
१२ औं ओभरको दोस्रोब बलमा स्पिनर रविचन्द्र आश्विनले ललितबाट शून्यमा क्याच गराएपछि कोलकता केहि दबाबमा परेको थियो । आवेशले दीनेश कार्तिकलाई १२ रनमा बोल्ड आउट गरेका थिए । दिल्लीका आवेश खानले ३ ओभरमा १३ रन खर्चेर सर्वाधिक ३ विकेट लिए । रविचन्द्रन आश्विन, ललित यादव, एनरिच नोर्किया र कागिसो रबाडाले एक एक विकेट लिए ।
त्यसअघि शारजाहमा टस हारेर ब्याटिङको निम्तो पाएको दिल्लीले २० ओभरमा ९ विकेट गुमाउँदै १ सय २७ रन बनाएको थियो । दिल्लीका स्टिभ स्मिथ र कप्तान ऋषभ पन्तले सर्वाधिक ३९–३९ रन बनाए । स्मिथले ३४ बलमा ४ चौका प्रहार गरे । पन्तले ३६ बलमा ३ चौका प्रहार गरे । शिखर धवन २० बलमा ४ चौका सहित २४ रनमा आउट भए । श्रेयस ऐर १, शिम्रन हेटमायर ४, आश्विन ९ र आवेश खान ५ रनमा आउट भए । अक्षर पटेल र ललित यादवले खाता खोल्न सकेनन् ।
कोलकाता सुनिल नारायणले ४ ओभरमा १८ रन खर्चेर २ विकेट लिए । लोकी फर्गुसनले २ ओभरमा १० रन खर्चेर २ विकेट लिए । वेंकटेश ऐरले २ र टिम साउथीले १ विकेट लिए ।
अंक तालिका
चेन्नई सुपर किंग्स १० खेलमा ८ जित र २ मा हार सहित १६ अंक जोड्दै शीर्षस्थानमा छ । दिल्ली क्यापिटल्स ११ खेलमा ८ मा जित र ३ मा हार सहित १६ अंकका साथ दोस्रो छ । दिल्ली र चेन्नईको प्लेअफ लगभग निश्चित भएको छ । औपचारिक मात्र बाँकी छ । आइपिएल इतिहासमा १६ अंक भएर पनि प्लेअफ नखेलेको रेकर्ड छैन । रोयल च्यालेन्जर्स बेंगलोर १० खेलमा ६ मा जित र ४ मा हार सहित १२ अंकका साथ तेस्रो स्थानमा छ । कोलकाता ११ खेलमा ५ जित र ६ मा हार सहित १० अंकका साथ चौथो स्थानमा छ ।
पन्जाब १० खेलमा ६ मा हार र ४ मा जित सहित ८ अंक जोड्दै पाँचौ स्थानमा छ । राजस्थान रोयल्स १० खेलमा ६ मा हार र ४ मा जित सहित ८ अंकका साथ छैटौं स्थानमा छ । मुम्बई इन्डियन्स १० खेलमा ४ मा जित र ६ मा हार सहित ८ अंक बटुल्दै सातौ स्थानमा छ । सनराइजर्स हैदराबाद १० खेलमा ८ मा हार र २ मा जित सहित ४ अंक जोड्दै पुछारमा छ ।
-1730900112.jpg)
