काठमाडौंमा ‘प्रकृतिको हस्ताक्षर’ : ठूलो लुम्पेकका कलात्मक ढुङ्गा प्रदर्शनीमा

समाचार

गृहपृष्ठ
समाचार
काठमाडौंमा ‘प्रकृतिको हस्ताक्षर’ : ठूलो लुम्पेकका कलात्मक ढुङ्गा प्रदर्शनीमा

काठमाडौंमा ‘प्रकृतिको हस्ताक्षर’ : ठूलो लुम्पेकका कलात्मक ढुङ्गा प्रदर्शनीमा

सोमबार, साउन २५, २०८३ कञ्चन खवर

२५ साउन, कञ्चन
यतिबेला गुल्मीको सत्यवती गाउँपालिका ठूलो लुम्पेकलाई कला मार्फत पर्यटकीय बजारीकरण गर्न काठमाण्डौमा संगम नामक कला पर्दशनी भइरहेको छ। गुल्मीको सत्यवती गाउँपालिका वडा नं. २ र ३ ठूलो लुम्पेकबाट संकलित प्राकृतिक स्वरूपका कलात्मक ढुङ्गाहरू प्राप्त कलात्मक आकृतिका ढुङ्गाहरूलाई महाल्हुम्पेकको परिकल्पनामा आधारित काठमाडौंको नेपाल आर्ट काउन्सिल ग्यालेरी, बबरमहलमा समसामयिक कलाको रूपमा प्रदर्शन भएको हो ।
समुद्र सतहदेखि करिब ५०० मिटरदेखि २ हजार ६ सय मिटर उचाइसम्मको विविध धरातलीय स्वरूप रहेको ठूलो लुम्पेकका पाखा–पखेरा, खोल्सा–खोल्सी तथा भिर–पहिरोबाट प्राप्त प्राकृतिक आकृतिका ढुङ्गाहरूलाई नेपाल आर्ट काउन्सिल ग्यालरी, बबरमहलमा प्रदर्शन गरिएको हो।
काठमाडौं विश्वविद्यालयअन्तर्गत आर्ट एण्ड डिजाइन विभागमा सन् २०२०–२०२४ सत्रमा अध्ययन गरेका विद्यार्थीहरूको समूह ‘संगम’ले गत वर्षदेखि सामूहिक कला प्रदर्शनी आयोजना गर्दै आएको छ। यसैक्रममा यस वर्ष ‘संयोजन’ नामक कला प्रदर्शनी आयोजना गरिएको हो।
प्रदर्शनीमा काठमाडौं विश्वविद्यालय, आर्ट एन्ड डिजाइन विभागका सहायक प्राध्यापक भुवन थापा ‘बहुवी’ले विशेष कलाकृति प्रस्तुत गर्नुभएको छ। उहाँले करिब ३० वर्षदेखि आफ्नो गाउँका पाखा–पखेरा, खोल्सा–खोल्सी, भिर–पहिरोबाट संकलन गर्दै आउनुभएका प्राकृतिक स्वरूपका ढुङ्गामध्ये १२ वटा कलात्मक ढुङ्गालाई ‘प्रकृतिको हस्ताक्षर’ नाम दिएर प्रदर्शनीमा राख्नुभएको छ।
प्रकृतिले आफैं निर्माण गरेका ती ढुङ्गाका आकृतिमा समयको दीर्घ यात्राका छाप र प्राकृतिक सौन्दर्य प्रतिबिम्बित भएको कलाकारको भनाइ छ। यी आकृतिमार्फत दर्शकको मन र प्रकृतिबीच भावनात्मक सम्बन्ध स्थापित गर्ने तथा ‘मनसँग मन’ जोड्ने उद्देश्य राखिएको छ।
प्रदर्शनीमा राखिएका ढुङ्गाका आकृतिप्रति दर्शकको भावना, विचार र स्मृतिलाई अभिव्यक्त गराउन तीन रङका टीका (स्टिकर) को समेत व्यवस्था गरिएको छ। दर्शकले आफूलाई मन परेको वा आफूमा विशेष भावना र स्मृति जगाएको आकृतिप्रति सम्बन्धित रङको टीका प्रयोग गरी प्रतिक्रिया जनाउन सक्ने व्यवस्था गरिएको आयोजकले जनाएको छ।
प्रकृतिले सिर्जना गरेका आकृतिलाई कलाको दृष्टिकोणबाट प्रस्तुत गर्दै दर्शकसँग प्रत्यक्ष अन्तर्क्रिया गर्ने प्रयासका रूपमा ‘प्रकृतिको हस्ताक्षर’लाई लिइएको छ।
‘संगम’ समूहले प्रदर्शनीको अवलोकन गरी प्राकृतिक कला, स्थानीय पहिचान र सिर्जनात्मक प्रयोगसँग साक्षात्कार गर्न सम्पूर्ण कला तथा प्रकृतिप्रेमीलाई आग्रह गरेको छ।

प्रकाशित मिति: सोमबार, साउन २५, २०८३ ११:३९

प्रतिक्रिया दिनुहोस्