९ भदौ, कञ्चन
सैनामैना १० सालझण्डीको विश्वशान्ति युवा क्लवले कञ्चन ३ हरैयाको रेन्वो एकेडेमीसंग दोश्रो गौतमबुद्ध कपका लागि प्रतिस्पर्धा गर्ने भएको छ। विश्वशान्ति युवा क्लवले सुनगाभा सामुदायिक बिकास केन्द्र, कञ्चन ४ रुपन्देहीलाई पराजित गरी रेन्वो एकेडेमीसंग उपाधीका लागि प्रतिस्पर्धा गर्ने भएको हो।
गौतमबुद्ध सामुदायिक बिकास केन्द्र, कञ्चन ५ पिपरीचापा रुपन्देहीको आयोजनामा सञ्चालित दोश्रो गौतमबुद्ध कप नाइन ए साइड फुटवल प्रतियोगिताको नवौ दिन भएको दोश्रो सेमीफाइनल खेलमा विश्वशान्तिले सुनगाभालाई १-० गोल अन्तरले पराजित गरेको हो। विश्वशान्तिका टिम क्याप्टेन विश्वास श्रेष्ठले खेलको पहिलो हाफको ४० औं मिनेटमा गरेको गोल नै दोश्रो सेमीफाइनल खेलका लागि निर्णायक गोल बन्न पुगेको हो।
सुनगाभा सामुदायिक बिकास केन्द्रका लागि गोल गर्ने आधा दर्जन भन्दा बढी प्राप्त भएको अवसरलाई सदुपयोग गर्न नसक्दा सुनगाभा गोलरहित बन्नु परेको थियो। सुनगाभाले गोलपोष्टलाई निशाना गरेर गरेका प्रहारहरुलाई विश्वशान्तिका गोल रक्षकले असफल बनाइदिएपछि विश्वशान्तिले फाइनलको यात्रा गर्न सफल भएको हो। हिजो भएको दोश्रो सेमीफाइनल खेलमा विश्वास श्रेष्ठ म्यान अफ द म्याच भएका छन।
विश्वशान्तिसंग फाइनलको यात्रा पक्का गरिसकेको रेन्वो एकेडेमीले बुटवलको योङ्ग ब्वाइजलाई १-० गोल अन्तरले पराजित गरेको थियो। हरितालिका तीजको सन्दर्भ पारेर संचालन गरिएको प्रतियोगिताका विजेता टिमले १,११,१११ रुपैया सहित कप, मेडल र प्रमाण पत्र पाउने छन भने उपविजेता टिमले ६६,६६६ रुपैया सहित कप, मेडल र प्रमाण पत्र पाउने खेल संयोजक रोशन पुनले जानकारी दिनु भएको छ।
यस्तै प्रतियोगिता अवधिभर उत्कृष्ट खेल प्रदर्शन गर्ने खेलाडीलाई नगद ५ हजार रुपैया सहित मेडल प्रदान गरिने बिधागत रुपमा उत्कृष्ट खेल प्रदर्शन गर्ने खेलाडीहरुका लागि पनि आकर्षक पुरस्कार रहेको खेल संयोजक पुनले जानकारी दिनु भएको छ।
प्रतियोगितामा न्यू सिर्जनशिल एफ.सि. कञ्चन ४ रूपन्देही, न्यू बुद्ध स्पोर्टस क्लब वाणगंगा नगरपालिका ११, रेन्बो एकेडमी कञ्चन ३ हरैया, रुपन्देही, मुर्गिया फुटवल क्लब सैनामैना ४ रुपन्देही, योङ्ग ब्याईज देवदह, रूपन्देही, चाँदनी युवा क्लब कञ्चन १ रुपन्देही, बुद्ध सेभेन स्टार क्लब सैनामैना ११ रूपन्देही, न्यू सिर्जना युवा क्लब तिलोत्तमा १३ रुपन्देही, सुनगाभा सामुदायिक बिकास केन्द्र कञ्चन ४ रूपन्देही, ईभोलुसन क्लब तामनगर, रूपन्देही, भैसाही युवा क्लब कञ्चन ५ रुपन्देही, एम.बि. ब्रोदर्श फर्साटिकर, रूपन्देही, करङ्गे एफ.सि. कञ्चन, रूपन्देही, गौतम बुद्ध सामुदायिक बिकास केन्द्र, कञ्चन ५ रूपन्देही, सुनौलो संगम युवा क्लब कञ्चन ३ रूपन्देही, बिश्व शान्ति युवा क्लब सैनामैना १० सालझण्डी गरी १६ फुटवल क्लवहरुले प्रतियोगितामा प्रतिस्पर्धा गरेका थिए।
कञ्चन ५ पिपरीचापा खेलमैदानमा भोली हरितालिका तीजको दिन १० गते दिउँस ३ बजे विविध कार्यक्रम सहित फाइनल खेल हुने आयोजकले जनाएको छ।
-1756430090.jpg)
