देशैभरिका लोक सांस्कृतिक नृत्यहरूको महामेला बुटवलमा

समाचार

गृहपृष्ठ
समाचार
देशैभरिका लोक सांस्कृतिक नृत्यहरूको महामेला बुटवलमा

देशैभरिका लोक सांस्कृतिक नृत्यहरूको महामेला बुटवलमा

मंगलबार, जेठ १९, २०८३ कञ्चन खवर

१९ जेठ, बुटवल/मनु गुरुङ्ग
यही जेठ २२ गते शुक्रवार बुटवलमा लुम्बिनी प्रदेशका ६ जिल्लाका सांस्कृतिक लोक नृत्यहरू एकै ठाउँमा प्रदर्शन हुने भएका छन्। नृत्य निर्देशक संघ नेपाल, रूपन्देही जिल्ला समितिको आयोजनामा हुने उक्त महामेलामा प्रदेश बाहिरका ४का जिल्लाका समेत सहभागिता रहने छ।
महामेलाले विभिन्न क्षेत्रका लोक नृत्यहरूबीच समधुर सांस्कृतिक सम्बन्ध बलियो बनाउने प्रयास गर्नेछ भने पूर्वको साकेला देखि राजधानीको नेवारी नृत्य, पौराणिक ताण्डव नृत्य, मध्य क्षेत्रको कौडा तथा घाटु, तराईको थारू नृत्य र पश्चिमको हुड्के लोक नृत्यले अब बुटवललाई संगीतमय र प्रफुल्लित बनाउने विश्वास गरिएको छ ।
जातीय, धार्मिक र क्षेत्रीय हिसाबले विविधतायुक्त नेपाली संस्कृतिलाई एउटै मालामा गाँसेर एउटै थलोमा प्रस्तुत गरिने यी अद्भुत लोक नृत्यहरूको रौनक हेर्न र बुझ्नका लागि नृत्य निर्देशक संघ रुपन्देहीले आग्रह गरेको छ।
यस महामेलामा संस्थाको केन्द्रदेखि नगर समितिसम्मका प्रतिनिधिहरूको उपस्थिति रहने र बुटवलका स्थानीय जातीय लोक नृत्यहरू र केही विद्यालयका लोक नृत्यहरूको समेत सहभागिता रहने जानकारी आयोजक संस्थाका अध्यक्ष सुन्दर गुरुङले जानकारी दिनुभएको छ ।
यसैगरी यो महा–नृत्य मेलालाई सफल बनाउन संस्थाका लुम्बिनी प्रदेश अध्यक्ष लोकेन्द्र शाहले प्रदेश तथा जिल्लाहरूबाट आउने नृत्य समूहहरूको समन्वय गरिरहनु भएको कार्यक्रममा विभिन्न जिल्ला र क्षेत्रबाट ३० देखि ४० वटा समूहको सहभागिता रहनेछ आयोजकले जनाएको छ। प्रत्येक समूहमा कम्तीमा ६ देखि २० जनासम्म कलाकार रहने र कुल सहभागी कलाकारहरूको संख्या करिब ४०० पुग्ने अध्यक्ष शाहले जानकारी दिनु भएको छ ।
बुटवल उपमहानगरपालिकासंगको सहकार्य तथा नृत्य निर्देशक संघ नेपाल, लुम्बिनी प्रदेश समिति सरक्षकत्वमा हुने उक्त महामेलाको व्यवस्थापन तथा आर्थिक संयोजनमा लुम्बिनी प्रदेश महिला उपाध्यक्ष मीना बुढाथोकीलाई जिम्मेवारी दिइएको आयोजकले जनाएको छ।
यसैगरी थ्री पोइन्ट गार्डेन प्रा.लि. देवसिद्धाचोक–११, बुटवलमा हुने उक्त महामेलाका लागि सम्पर्क कार्यालयको जिम्मेवारीको रुपमा लुम्बिनी प्रदेश सचिव दावा शेर्पालाई दिइएको छ भने महामेलामा करिब १ हजार दर्शकले प्रत्यक्ष अवलोकन गर्ने अनुमान गरिएको प्रदेश कोषाध्यक्ष रजनी श्रेष्ठले जानकारी दिनु भएको छ। कार्यक्रम बिहान ११ बजेबाट शुरु हुने छ।

प्रकाशित मिति: मंगलबार, जेठ १९, २०८३ २०:३३