शुद्धोधनमा सबैका लागि शिक्षा अभियान अन्तर्गत पुराना कपी संकलन

समाचार

गृहपृष्ठ
समाचार
शुद्धोधनमा सबैका लागि शिक्षा अभियान अन्तर्गत पुराना कपी संकलन

शुद्धोधनमा सबैका लागि शिक्षा अभियान अन्तर्गत पुराना कपी संकलन

शुक्रबार, वैशाख २५, २०८३ कञ्चन खवर

२५ बैशाख, शुद्धोधन
रुपन्देहीको शुद्धोधन गाउँपालिकामा सबैका लागि शिक्षा अभियान अन्तर्गत पुराना कपी संकलन गरिएको छ। मानमटेरिया साथी सञ्जाल, शुद्धोधन रुपन्देहीले शुद्धोधनका आर्थिक कारणले विद्यालय शिक्षाबाट टाढा रहेका बालबालिकाहरुलाई शिक्षाको पहुँच दिलाउन एक पटक प्रयोग गरि फालिएका कपीहरु संकलन गर्ने कार्यलाई अगाडी बढाएको हो।
एक पटक प्रयोग गरी फालिएका कपीहरुबाट प्रयोग नभएका खाली पानाहरुबाट नयाँ कपीको निर्माण गरी आर्थिककारणले पढाई छाडेर विद्यालय जान नपाएका बालबालिकाहरुलाई निःशुल्क रुपमा कपी उपलब्ध गराई पुनः पढ्न प्रोत्साहित गर्ने उद्धेश्यका साथ पुराना कपीहरुको संकलन गर्ने अभियान सञ्चालन गरिएको मानमटेरिया साथी सञ्जालका अध्यक्ष श्रृजना थारुले जानकारी दिनु भएको छ।
यसैगरी सबैका लागि शिक्षा अभियान अन्तर्गत शुद्धोधन गाउँपालिकाका विभिन्न सामुदायिक विद्यालयहरुमा अध्ययनरत विपन्न तथा जेहेन्दार विद्यार्थीहरुका लागि छात्रबृत्ति प्रदान गर्न विद्यालयहरुसंग समन्वयगरी नाम संकलन समेत गरिएको अध्यक्ष थारुले बताउनु भएको छ।
रुपन्देहीको शुद्धोधन लगायत कञ्चन, गैडहवा र लुम्बिनी सांस्कृतिक नगरपालिकामा कृयाशिल साथी सञ्जालहरुले पुराना कापी र पुस्तकहरुको संकलन गरी सबैका लागि शिक्षा अभियान सञ्चालन गर्दै आइरहेका छन।
सुनगाभा सामुदायिक बिकास केन्द्र, कञ्चन ४, सुनगाभाचोक रुपन्देहीको सहयोग तथा समन्वयमा विभिन्न साथी सञ्जालहरुले लागु पदार्थ दुरुपयोग विरुद्ध गाउँ गाउँमा विभिन्न सचेतनामूलक कार्यक्रमहरु समेत सञ्चालन गर्दै आइरहेको कञ्चन साथी सञ्जालका अध्यक्ष सुस्मिता नेपालीले जानकारी दिनु भएको छ। ती साथी सञ्जालहरुमा करिब ४ हजार भन्दा बढी किशोर किशोरी र बालबालिका आवद्ध रहेका छन।

प्रकाशित मिति: शुक्रबार, वैशाख २५, २०८३ १२:४७

प्रतिक्रिया दिनुहोस्