दिदि बहिनी बचत तथा ऋण सहकारी संस्था, कञ्चनको ११ औं साधारण सभा सम्पन्न

समाचार

गृहपृष्ठ
समाचार
दिदि बहिनी बचत तथा ऋण सहकारी संस्था, कञ्चनको ११ औं साधारण सभा सम्पन्न

दिदि बहिनी बचत तथा ऋण सहकारी संस्था, कञ्चनको ११ औं साधारण सभा सम्पन्न

शुक्रबार, मंसिर २७, २०८२ कञ्चन खवर

२६ मंसिर, कञ्चन
दिदी बहिनी बचत तथा ऋण सहकारी संस्था लिमिटेड, कञ्चन ४ सुनगाभा चोक रुपन्देहीको ११ औं साधारण सभा सम्पन्न भएको छ। सभाले संस्थाका अध्यक्ष सुमित्रा बुढाथोकीले प्रस्तुत गर्नु भएको बार्षिक प्रतिवेदन र लेखा सुपरिवेक्षण समितिका संयोजक निरा रानाले प्रस्तुत गर्नु भएको लेखा सुपरिवेक्षण प्रतिवेदन सर्बसम्मत अनुमोदन गरेको छ।
सभामा जिल्ला सहकारी संघ, रुपन्देहीका महासचिव दामोदर पंगेनीले केही सहकारी संस्थाका सञ्चालक र ऋणीहरुका कारण राम्रा गर्ने सहकारी संस्थाहरु समेत सहकारी ऐनका कडा नियम र विभिन्न नियमनकारी निकायहरुको इजाजत लिनु पर्ने बाध्यात्मक परिस्थिति आइपरेको बताउनु भयो। हिजो सहकारी आफैमा स्वायत्त संस्थाको रुपमा थियो तर पछिल्लो समयमा सहकारी संस्थाहरुको नियमन राष्ट्र बैंक सहित राष्ट्रिय सहकारी नियमन प्राधिकरणले समेत शेयर सदस्यहरुको चाहना र शेयर सदस्यहरुद्वारा निर्माण गरिएको विनियम अनुसार सहकारी सञ्चालन गर्न नसकिने अवस्था आएको महासचिव पंगेनीले बताउनु भयो।
यस्तै कञ्चन सहकारी सञ्जालका अध्यक्ष पुष्पराज शर्माले बचत तथा ऋण सहकारी संस्था बाहेक विभिन्न बिषयगत सहकारी संस्था भएपनि ३० प्रतिशत भन्दा बढी वित्तिय कारोवार गर्ने कुनै पनि सहकारी संस्थाहरुले राष्ट्रिय सहकारी नियमन प्राधिकरणबाट समेत इजाजत लिई कारोवार सञ्चालन गर्नुपर्ने बताउनु भयो। यसैगरी कञ्चन गाउँपालिकामा बढीमा ५ वटा भन्दा बढी सहकारी संस्थाहरु आवस्यक नरेहको र एकै प्रकृतिका सहकारीहरु समायोजनको विकल्प नभएको सञ्जालका अध्यक्ष शर्माले बताउनु भयो।
४४४ जना महिला शेयर सदस्य रहेको संस्थाले गत बर्षको आर्थिक बर्षमा ५ लाख १३ हजार २१९ रुपैया नाफा गरेको र १८ लाख १३ हजार ५६२ रुपैया जगेडा कोष रहेको संस्थाका अध्यक्ष सुमित्रा बुढाथोकीले जानकारी दिनु भएको छ। यस्तै सभामा संस्थाका जेष्ठ शेयर सदस्य भूमा उपाध्याय र असल ऋणीको रुपमा अर्मता फौजदार र रिना थापालाई सम्मान गरिएको थियो।
संस्थाका अध्यक्ष सुमित्रा बुढाथोकीको अध्यक्ष, उपाध्यक्ष कमला बि.क.को सञ्चालनमा भएको सभामा धारेहर बचत तथा ऋण सहकारी संस्थाका अध्यक्ष कविराज ढकाल, निश्चल कृषि सहकारी संस्थाका अध्यक्ष जगीलाल थापा, कञ्चन महिला उद्यमी कृषि सहकारी संस्थाका अध्यक्ष हिमा बेलवासे, संस्थाका सल्लाहकार तारा काउचा लगायतले संस्थाको संस्थागत तथा वित्तिय प्रगतिको कामना सहित पछिल्लो समय सरकारले लिएको सहकारी ऐन, प्रावधान र नियमहरु सहकारीका शेयर सदस्यहरुको हित विपरित रहेको बताउनु भएको थियो।
सुनगाभा सामुदायिक बिकास केन्द्र, कञ्चन ४ सुनगाभा चोक रुपन्देहीको परिसरमा भएको कार्यक्रममा शेयर सदस्यहरुले संस्थाका प्रतिवेदनमाथी शेयर सदस्यहरु सिता अधिकारी लगायतले उठाउनु भएको सवालहरु माथी सञ्चालक समितिको तर्फबाट संस्थाका अध्यक्ष सुमित्रा बुढाथोकीले जवाफ दिनु भएको थियो। सभामा दिदी बहिनी बचत तथा ऋण सहकारी संस्थाका सञ्चालक समितिका सदस्य सुशिला क्षेत्रीले स्वागत गर्नु भएको थियो।

प्रकाशित मिति: शुक्रबार, मंसिर २७, २०८२ १७:३८

प्रतिक्रिया दिनुहोस्